ده شوية كلام كتبته عن رأيى فى تويتر , قد تتفق أو تختلف معايا و لكنه سيظل رأيى اللى مقتنع بى و يحمل الصواب و الخطأ.
فى مرحلة ما تويتر هيكون مجرد مرحلة فى حياتنا
تويتر بقى واخد حيز من التفكير عندنا أكبر من حاجات تانية كتير , كلنا بنتعامل معاه على انه حاجة كبيرة محدش ينكر ده
انا كنت داخل تويتر على اساس انه مصدر للأخبار بشكل عام فى مصر , حاليا الموضوع قلب جامد و مبقاش فى اخبار
لما قلت تويتر هيبقى مرحلة فى حياتنا قصدى التعامل معاه بالشكل اللى انا بتعامل معاه بى و معظم الناس اللى أعرفهم .. انه إدمان يومى
كلنا بنبقى عايزين تويتر على حسب مزاجنا
الولع بتويتر ده هيقل تدريجيا و هيبقى مجرد اداة لمعرفة الأخبار و التعليق عليها أو كتابة خواطر او جمل معينة مش هنتويت اى حاجة , دى المرحلة
منكرش انى عرفت ناس كتير كويسين هنا و حبيتهم و خرجت معاهم و شوفتهم و الصداقات دى هتستمر , لكن الولع بتويتر ده اللى انا زهقت منه
نكبر دماغنا من مين عمل فولو و مين عمل ان فولو , واحد بس اللى زعلت لما عملى ان فولو عشان انا بحبه و الباقى كل واحد براحته
ميشو قالى متتعاملش بالانفولو على اساس انه علاقة شخصيه و هتستريح كل واحد حر و الانفولو مالوش علاقة بالصداقة و العلاقة اللى بينا
متكبروش المواضيع و ادوها حجمها الطبيعى و كله هيبقى تمام , بقينا نعمل هاشتاجات لناس هنا و نشتم فيهم و نفسنة بنات و حوارات مكانتش موجودة
حاجات بتضايقنى هنا بردو المزايدة سواء على ناس زعلانة او فرحانة فى حدث ما , سيبوا كل واحد حر يفرح يزعل تلاقيه بيشتم اعمله ان فولو و ريح دماغك
انت سيد قرارك هنا مش حد تانى , ساعات كتير بتخنق من ناس انا عاملهم فولو و اكيد هما كمان بس انا باخد الناس بحلوها و مرها و مبيفرقش معايا
ساعات ببقى عايز اتريق على حدث ما و ساعات ببقى زعلان و مش عايز اتكلم و مبقولش حاجة مراعاة لشعور صحابى
كل واحد يتعامل زى الحقيقة قرفان منى اعملى ان فولو و متفقعش نفسك اكترمن كده , مبحبش العلاقات المزيفة
متعمليش فولو عشان بتشوفنى فى البورصة و بقعد معاك ساعتين و امشى , مبتحبنيش اعملى ان فولو , الحياة ابسط من كده
انا عايز الناس تعملى فولو عشان هما بيحبونى و بيحبوا يقروا كلامى , مش عشان صحاب و بنشوف بعض فى البورصة أو عشان مصلحة ما أو عشان فولو باك حتى
نفسى أدخل تويتر اتبسط شوية و امشى , مش عاجبنى حالتى و ادمانى لي ده , و معرفش الحالة دى هتخلص امتى بس اتمنى انها تخلص قريب لأنى زهقت
حتى أبسط قواعد الأختلاف مبقناش عارفين نعملها و مبقناش عارفين نسمع بعض و بنشتم بعض على ابسط حاجة
احنا فعلا مينفعناش ديموقراطية لأننا مش عارفين نطبقها , الديموقراطية مش شتيمة فى خلق الله لمجرد الإختلاف فى الأفكار ووجهات النظر
الديموقراطية رقى و تحضر و تسمعنى و أسمعك و يا تقنعنى يا أقنعك , أغلبنا على تويتر هنا فاشيين و مبنحبش نسمع غير صوت الثورة
يا جدعان اللى مخنوق من حد يعمله ان فولو متفقعش نفسك أكتر من كده لمجرد الفولو بتاعه او عشان ميزعلش , الحياة هتبقى ابسط و هنبطل نشتم بعض
المشكلة لما حد بيتخنق من التايم لاين و يشتم فى بيبقى بيشتم فى الناس اللى هو عاملهم فولو , هحاول مشتمش فى التايم لاين تانى
البساطة أسهل الأشياء و أفضلها فى التعامل , انا فى سلبيات و مش ملاك انا اكيد فيا حاجات كتير من اللى قلتها دى و هحاول اصلح من نفسى
محدش فينا ملاك و كلنا بنغلط , و كلنا فينا العبر و هتحب واحد عشان حاجة هتكرهوا عشان حاجة تانية
أرجو ان مكونش تقلت عليكوا و أرجو كمان محدش يفضل عملى فولو غير لأنه بيحبنى و بس , مش عايز ناس عملالى فولو مصلحة او عشان بتشوفنى شكرا ليكم
الكلام خلص لحد هنا .. مرضتش ألزق التويتات فى بعض و أعملهم على شكل مقال أو أزود حاجات عشان مبوظهمش , حسيتهم كويسين كده.
