الزحمة فى كل مكان فى حياتنا .. أوضتك زحمة دماغك زحمة تلفزيونك زحمة شارعك زحمة تليفونك زحمة , تقريبا مفيش مكان فاضى فى حياتنا.
الأوضة ممكن متكونش زحمة أوى زى أى مكان تانى بس هى زحمة من أول لبسك اللى بترميه لما تقلعه و تكسل تعلقه للى بتلبسه فى رجلك و ترميه فى أى حتة
لأزايز المياه اللى مليا الأوضة للأطباق اللى بتاكل فيها و بتنسى تشيلها للكتب اللى ع المكتب و بترب من ركنتها لدرجك اللى مليان حاجات ملهاش لازمة بس عملا
بنظرية كله بينفع بعد كده الدُرج مليان..طبعا لو بصيت فى أوضتك هتلاقى الحاجات دى و يمكن حاجات مكلكعة اكتر من كده بس لو انت معندكش اى حاجة من
دول فأنت معندكش زحمة الدماغ !
زحمة الدماغ احيانا بتكون السبب فى زحمة الأوضة لأنك مش فاضى تنضفها من كتر الحاجات اللى فى دماغك و عايز تعملها و مش حاطط الأوضة فى أولوياتك
او بيبقى كسل و دى مشكلة تانية...الدماغ مبتفضاش دايما مليانة و بتفكر من اول حاجات انت عايز تعملها و تنجزها لطلبات مامتك او باباك للتفكير فى هنتغدى ايه
النهاردة او مين عملى لايك على ستاتيس الفيس بوك و مين عاملى ادد و البس ايه بليل و انا نازل؟ لماتش الأهلى الجاى هيكسب ولا هيخسر للزمالك اتعاقد مع
مين للبلد رايحة على فين و ايه اخرتها !
تلاقى فراغ صغير دخل للدماغ و تحس ان الدنيا فضيت و زهقت من الفيس بوك و النت كله فتقرر انك تتجه للتلفزيون و كلك عشم فى حاجة عدلة تتفرج عليها ..
تمد ايدك تجيب الريموت و عندك مش أقل من 50 قناة بتتفرج عليها و مظبتهم فى الـ favorite ..تفضل تقلب من قناة لقناة و تخلص الـ 50 و
تدخل على 50 غيرهم و متلاقيش حاجة , زحمة قنوات بس مش لاقى حاجة تتفرج عليها , افلام كلها متعادة و توك شو لا بيقدم ولا بيأخر و معانا مش عارف مين
الناشط السياسى و مش عارف مين شاهد عيان فى ناس كويسة من النشطاء دول و فى ناس بيتقال عليهم نشطاء و هما مالهمش فيها و اهى سبوبة و خلاص و
شهود العيان اللى بيتكلموا دول طب انا اعرف منين انه كان هناك و انت مش مطلعه يقول كلام و خلاص ؟ ده غير الكليبات الهابطة لمطربين نعرفهم و
منعرفهمش و مسلسلات هرمنا منها و من كتر اعادتها و فى الاخر تلاقى نفسك قاعد قدام عم العنكبوت المجنح اللى عارف كل حاجة فى البلد و محدش غيره فاهم
غير هو و اللى مشغله و عمو المشير بيحبهم و بياخد كلامهم ثقة و علاقتهم بالمجلس لوز الجوز و احنا اللى مبنفهمش ..
كل ده كوم و زحمة الشارع كوم تانى خالص , فالناس اساسا من كتر الزحمة بقت تسيب الرصيف و تمشى فى الشارع مع العربيات اللى سواقينها مش طايقين
نفسهم اساسا و بيخانقوا دبان وشهم و ده بيظهر جدا لما واحد يكسر عليك فجأة أو يقف فجأة من غير ما يدى انتظار او بيرجع مارشدير عشان اللفة او نزلة
الكوبرى فاتته او راكن صف خامس عشان بيجيب حاجة و راجع على طول و موقف الشارع عادى او حد حك فى العربية فينزل يتخانق و يوقف الشارع برده
عادى مع ان العربية محصلهاش حاجة اللى مش عادى بقى ان سواق الميكروباص يقفلك فى نص الشارع و ينزل الناس و برده فاكر ان ده عادى !
طلع تليفونك من جيبك و بص فى كده هتلاقيه زحمة جدا خاصة اذا كان الميمورى بتاعتك 8 جيجا .. هتلاقى نفسك حاطط كل الأغانى اللى بتسمعها و مبتسمعهاش
و اللى مبتسمعهاش موجودة عشان لو حد سألنى عندك كذا فتقوله اه عندى ابعتهالك ؟ فى ناس تليفونتها فيها فوق الألف صورة معرفش بيعملوا بيهم ايه سواء
كانوا مصورينهم او منزلنهم عادى..معنديش مشاكل فى التصوير و الصور ممكن تتصور و تحطهم على اللاب توب عادى لكن المشكلة فى انه لما تتسأل عن اى
حاجة لازم تبقى موجودة عندك و خلاص اهم دول زى السوبر ماركت كده اى حاجة تلاقيها عندهم و كأنه بيبيع .. بصيت فى الاسماء اللى عندى لاقيت فوق ال
300 اسم تقريبا بكلم ربعهم بس و الباقى اهو موجود و خلاص برده !
ممكن تكون مستفدش حاجة من اللى انا كاتبه او معجبكش و ليك الحق فى ده بس اعذرنى هى كانت شوية زحمة فى الدماغ و طلعت !
