الشـــعــب يـــريــد شـرطـة من جــديــد

انهاردة الذكرى الأولى لوفاة خالد سعيد على إيد حفنة من الأغبياء و عديمى الأخلاق و الإنسانية و قول كل اللى نفسك فى عن مخبرين و ظباط جهاز الشرطة المصري التابع لنظام مبارك على مدار 30 سنة...

وفاة خالد سعيد أو استشهاده كما يرى البعض كان هو الشرارة المحركة و احد الركائز الأساسية لثورة 25 يناير العظيمة فى ظل نظام قمعى فضل طابق على نفسنا 30 سنة لحد ما الناس عفنوا و ريحتنا طلعت...الثورة قامت لتصحيح حجات كتير فى البلد بايظة ان لم تكن كلها ! من أولويات الثورة كانت تغير نظام التعامل بين الشرطة و المواطن عشان يبقى تعامل على اسس من الكرامة و العدل و دى حاجة من حق أى إنسان فى الدنيا انه يطلبها خصوصا لو كنا فى بلد ديمقراطى كما كان يطلق عليها الحزب الوطنى المنحل و هو كان اسمه الحزب الوطنى الديمقراطى ..الديمقراطية كانت بين رؤس الحزب نفسه فى تقسيم التركة او تقسيم البلد فكانوا بيقسموها كل واحد حسب احتياجاته و متطلباته لكن اى حد برا الحزب او جو الحزب مالوش اهمية فمكانش بيتمتع بأى صور من صور الديمقراطية..

نرجع لجهاز الشرطة اللى لسه محسش ان فى ثورة قامت و بيتعامل بغل رهيب اذا سمحت له الظروف بذلك..

·      لسه التعذيب فى الأقسام شغال و اخرها أحداث الأزبكية و وفاة سواق الميكروباص

·       سياسة تلفيق القضايا للمواطنين موجودة برده و أشهرها بعد الثورة قضية الدكتور عمرو الشلقانى المدرس بكلية الحقوق فى جامعة القاهرة ..

·      استخدام عربيات الشرطة (البوكس) فى الأغراض الشخصية و توصيل افراد تابعين لقيادات الجهاز فى محافظات مختلفة..

·      التعامل بعنف شديد تجاه المتظاهرين السلميين امام سفارة اسرائيل ..تغطية المصرى اليوم للخبر

(http://www.almasryalyoum.com/node/439516

و ده فيديو لانتهاكات الشرطة قبل الثورة

طبعا كل ده على سبيل الذكر وليس الحصر لأن معتقدش حد يقدر يحصر كل انتهاكات الشرطة فى حق المواطنين سواء مذنبين او غير مذنبين

بعد كل ده بقى فوزارة الداخلية عايزة يتعملها فورمات بمعنى ان كل ظابط فاسد يتشال نهائيا و يتم اعادة تنسيق الجهاز بأكمله من الأول عشان نبدأ على نضافة !

جهاز الشرطة لم يستطيع حتى الآن التخلص من جلباب ابوه و ليه عذره لأن الجلابية بقالها 30 سنة و يمكن أكتر بس احنا دلوقتى شايفين جلابية معفنة ملوثة بالدم و احنا زهقنا و طهقنا من منظرها ده و قررنا نجيب واحدة تانية نضيفة ليهم يحافظوا عليها و ميوسخوهاش بالدم تانى و عشان ده يحصل لازم نحمل برنامج ((مصر بعد الثورة)) لكل ظابط شرطة فى مصر و للطلبة طبعا لأن الأمل فيهم و نشيل البرنامج القديم بكل فيروساته و سبماته بسلطاته ببابا غنوجه !

البرنامج ده يتضمن الأتى

1-معاملة المواطنين معاملة أدامية

2- عدم المساس بكرامة المواطن بأى شكل من الأشكال

3-المعاملة الحازمة مع المتهمين بدون انتهاكات و فى ظل ما ينص عليه القانون

4- تيسير أعمال المواطنين بدون رشوة أو محسوبية

5- عدم التمييز بين مواطن و أخر (مش عشان الحاج صاحب البيت عنده قرايب مهمين يقوموا يحبسوا الناس اللى فى البيت)

6- الغفير يتعامل زى الوزير داخل الأقسام

7-عدم استخدام سيارة الشرطة او العساكر فى خدمات للظباط (العسكرى مش شغال عندك العسكرى بيساعدك عشان تشتغل )

8- مفيش ظابط يخاف من أى حد مخالف للقانون لو غلطان احبسه و الغاء جملة انت متعرفش انا ابن مين ؟

كلمة لكل ظابط شرطة شريف : أرجوك تبين الفساد ناحيتك عشان نطهر البلد و الشعب هيحطك فى عنيه و متخافش كل فاسد هيتشال عاجلا ام اجلا و هتاخد حقك فى شغلك و قول للى أكل الحرام يخاف بكره الشعب هينفخوا

كلمة للظباط الفاسدين : غيّر قبل ما تتغير

لو الكلام ده محصلش يبقى الشرطة يعدوا فى بيتهم و يلبسوا طرح احسن بقى..

عايزين بلدنا أحسن و ده مش هيحصل غير لما نطهر الشرطة عشان القانون يطبق صح على الفساد و ميبقاش فى تستر على أى حاجة بعد كده احنا مش أقل من أى حد احنا أعظم شعب فى الدنيا بس محتاجين نغير من نفسنا