قاعد لوحدى فى الأوضة مبعملش حاجة
- مبتذاكرش ليه ؟
- أذاكر ايه يا عم بس فى أم الجو ده و بعدين أنا زهقان من المذاكرة أساسا
- خلاص اتفرج على التلفزيون
- تلفزيون ؟ التلفزيون مفيهوش حاجة و ممل و لو مفيش ماتشات مالهوش لازمة
- خلاص افتح اللاب توب و اتفرجلك على فيلم
- فكرة حلوة
أروح أجيب اللاب توب و الشاحن و كوباية شاى بلبن و المَزة بتاعتى و أقعد
- هاه هتتفرج على فيلم ايه ؟
- مش عارف لسه ,استنى اما أشوف بقى , أنا منزل أفلام كتيرة لسه مشوفتهاش
- عندك أكتر من 10 أفلام أهم أختار بقى و أنجز
- هممم..أكشن ؟!
- مش ناقصة وجع دماغ يا عم شوفلنا حاجة خفيفة
- بس..لاقيتها فيلم رومانسى اهو كنت منزله و لسه مشوفتوش و واخد أوسكار
- الفيلم جامد بس هيفكرك بيها و انت مش ناقص قرف ع المسا
- طب أعمل ايه يعنى ؟ مش عارف أختار
- بقولك ايه أفتح تويتر و اسأل الناس الحلوة اللى عندك دي
أنزل الفولدر تحت و أروح ع البراوزر و أبعت تويتة عبر الأثير عشان أسأل على حاجة حلوة أتفرج عليها
" بقولكوا ايه يا بيبول أتفرج على فيلم ايه من الأفلام دى"
- خُدلك جولة فى النت و الفيسبوك كده على ما يجيلك منشنز
- طيب أما نشوف
أفتح الفيسبوك و أتجول فى شوية
- مفيش ولا نوتفيكشن محدش عبرك
- يا عم انا مبدخلش هنا أصلا عشان حد يعبرنى
- عندك حق الفيسبوك بقى بيض أصلا و مش حلو زى تويتر
- ايه ده ؟ بص الواد ده كاتب ايه " كفاية بقى يا بتوع التحرير هتخربوا البلد"
- فعلا انت كفاية عليك كده , و أدى الريموف المتين بالسلامة يا عجلة الأنتاج
- أيوة بقى أحبك و انت سخن
- فكك بقى و يلا نشوف المنشنز
أقفل الفيسبوك و أرجع تويتر تانى أفتح المنشنز
أ- بص الفيلم ده جامد أوى أتفرج عليه
- الواد ده عبيط ولا ايه الفيلم اساسا مش ضمن الأفلام اللى انا سأل عليها
- معلش هو الفيلم جامد فعلا بس الراجل حب يخدم مش أكتر
" @أ ماشى يا ابو الكباتن ألف شكر ^^ "
ب- الفيلم الأولانى أجمد وش
- الواد ده بيفهم
- خلاص هتفرج على الفيلم الأولانى
" @ب و النبى انت برنس "
ج- لأ اتفرج على التانى أجمد بكتير :D
- أوبا موزة تتحدث , هتتفرج على انهى بقى يا حيلتها ؟
- على التانى طبعا ! و هى دى عايزة كلام
- اه يا سيس يا بتاع النسوان
- يا عم اهمد بقى خلينا نشوف المصلحة دى
"@ج ماشى يا عسلية انتى تؤمرى بس ":D
د- فى هجوم دلوقتى ع الإعتصام و انت بتتفرج على فيلم صباح الروقان – فيا ويب
- مين البيضة اللى ع المسا دى و كمان فيا ويب لازم يتفشخ
- طبعا هيتفشخ انا هرفعه دلوقتى
"@د ولما انت مناضل أوى كده يا حلتها منزلتش ليه و لا بتفشخوا الناس مزيدات و خلاص يلا ياد يا ابن ال***** مش ناقصة أشكال ضالة"
- روح يا عم شوف في ايه ع التايم لاين
- بقولك ايه العملية مش ناقصة كأبة ووجع قلب
- طب و الناس اللى بتضرب دى ؟ هتعمل زى بتوع الفيسبوك و تقول ايه وداهم هناك ؟
- يا عم هو انا قلت ايه وداهم هناك ؟ انا بس مش طالبة معايا وجع قلب و بعدين انت بتزايد عليا ولا ايه ؟!!
- يا عم لا بزايد ولا بتنيل روح بس بص بصة كده و شوف الدنيا فيها ايه
- حاضر يا عم أما نشوف أخرتها
"ع : يا جماعة محدش يعمل ريتويت لأى حد الأعتصام أمان و مفيش بلطجية ولا حاجة .. ريتويت بقى "
- طب الحمدلله
- شوفت يا عم أهو مفيش حاجة قلبتلى دماغى ع الفاضى
- يا عم و انا مالى ما هو الواد هو اللى قال و انا بجيب حاجة من عندى
- بس بقى خلاص انت فصلتنى انت و الواد بتاعك ده
- يعنى مش هتتفرج على الفيلم ؟؟
- لأ يا عم مش هتفرج على حاجة , مساء الخرة على عيونك
قفلت اللاب توب و بعدين روحت ع السرير عشان أنام و بصيت للسقف و يا ريتنى ما بصيت ...
