صراع الأنتخابات

الأنتخابات البرلمانية فجأة تحولت لبعبع و مش عارفين نعمل معاها ايه ؟ و ده لسبب بسيط ان الأغلبية الكاسحة من الشعب المصرى مكانتش بتنتخب او بيفرق معاها أصلا انتخابات من عدمه لأننا كنا بنبقى عارفين النتيجة مسبقا و هى اكتساح الحزب الوطنى فى جميع الدوائر و المحافظات بفضل التزوير طبعا مش حبا فى أعضائه.. طيب دلوقتى فى انتخابات و مفيش حزب وطنى بس فى إخوان و سلفيين و تيارات ليبرالية تانية , ناس خايفة من اكتساح التيارات الأسلامية للبرلمان الجاى و ناس عادى مش فارقة معاهم المهم يكسبوا بنزاهة , انا من الفريق التانى بس مش هنتخب حد منهم لأنى عندى تحفظات على أدائهم و تصريحاتهم فى الفترة الأخيرة من أول ثورة 19 نوفمبر و اللى سقط فيها شهداء و مصابين أكتر من ثورة 25 يناير نفسها .. ناس بتدعو لعدم النزول للأنتخابات احتراما للناس اللى استشهدوا و ناس بتطالب بضرورة النزول و انها معركة لازم نخوضها لإنجاح أصوات الثورة المرشحة.

عدم النزول للأنتخابات خطر كبير على الثورة لأن لو مفيش حد نجح من شباب الثورة أو القوائم الثورية مش هيبقى للثورة صوت فى البرلمان و هيبقى فى سيطرة للتيارات الإسلامية و بعض الفلول , الخطر مش فى وجود تيار اسلامى فى البرلمان لكن اللى يخلينى أقلق منهم هو استمواتهم على الأنتخابات و عدم مشاركتهم فى 19 نوفمبر و الدعوة لفض الأعتصام بالقوة كمان !! و هما ولا فارق معاهم اللى حصل ولا الناس اللى استشهدوا ولا المصابين ولا أى حاجة , طب أزاى انا أستأمنهم على مكان فى البرلمان طالما مسألوش فى الناس كده ؟ الكلام على القيادات الأخوانية و التيارات الأسلامية اللى رفضوا المشاركة لأن كان فى شباب إخوانى و سلفى بيشارك بمفرده بعيدا عن الجماعة..يعنى احنا لو منزلناش الأنتخابات كده بنسبة كبيرة الأخوان هيسيطروا و منستبعدش يحصل تزوير لعدم مشاركة الناس , بكل بساطة ممكن صوت حضرتك يتزور لأنك منزلتش بنفسك

مش شرط للأخوان لأى فرد نازل الأنتخابات و انت لو قاطعت الأنتخابات مفيهاش أى مزايا , انت بالظبط عامل زى اللى عنده امتحان و بيقول مش هذاكر عشان معرفش الأسئلة و كده كده الامتحان هيتعمل و فى ناس هتمتحن و انت بس اللى هتسقط و ترجع تقول يا ريت اللى جرى ما كان .. يعنى انا قصدى تعرف مين المرشحين الكويسين اللى يستاهلوا و شايف انهم هيحققولك طموحاتك و تنتخبهم مش تقول انا مش هنزل عشان انا معرفش حد و كمان عشان حق الناس اللى ماتت عدم نزولك هو اللى هيضيع حقهم لو مفيش حد بصوت الثورة جوه البرلمان و عدم نزولك مش هيسقط المجلس العسكرى , احنا نزلنا عشان إسقاط المجلس العسكرى اه , بس الأنتخابات واقع و مفروض علينا و لازم نحط بصمت الثورة في البرلمان و منقعدش فى بيوتنا نتفرج و نولول لو مفيش حد من الثورة كسب.

الأنتخابات على يومين و منعرفش الصناديق هيحصل فيها ايه بليل و اذا كان المجلس مش سامع صوتى فى الميدان هيسمعه فى الصندوق ؟ انا معاك ان ده وارد بس احنا المفروض اللى نقود الأنتخابات مش المجلس العسكرى و مش حد تانى , الأنتخابات دى للشارع مش لحد تانى احنا ننزل و نصور و نوثق أى أفعال هتحصل ضد العملية الأنتخابية من بلطجة او تزوير و بليل نعمل لجان شعبية لتأمين اللجان الأنتخابية من أى حاجة و احنا قادرين على ده.

دى شوية تصريحات للواء ممدوح شاهين انهاردة
** صلاحيات رئيس الجمهوريه ضعيفه في الاعلان الدستوري
**رئيس الجمهوريه ليس له صلاحيات حل مجلس الشعب
** دستوريا وقانونيا مجلس الشعب لا سلطه له على الحكومه
** المشير قد يغير الحكومه بعد انتخابات مجلس الشعب
**غير صحيح ان الحكومه ستتغير بعد مجلس الشعب الحكومه قانونيا باقيه
** المجلس الاعلى الشعب مأيده بالكامل
** الرئيس السابق لم يجد اي شخص لتسليم السلطه له الا المجلس الاعلى
** القوات المسلحه هي السبب الرئيسي في نجاح الثورة
** استفتاء مارس هو تأييد للمجلس العسكري
** الشرطه والامن عادت بنسبه 80%
** المجلس قدم بموافقه 14 مليون مصري وعوده المجلس الى ثكناته خيانه للبلد
** رئيس الوزراء له مطلق الصلاحيات في اختيار وزرائه

طبعا واضح من التصريحات انه بيقولك ان مجلس الشعب ده هيبقى فى البالون و متنزلش أكرملك انا مش هقولك حاجة بس دى شوية مواد من الأعلان الدستورى اللى كان عليه استفتاء فى 19 مارس و مكانش على شرعية المجلس العسكرى زى ما هو قايل

 ( مـــــادة 33 )

يتولى مجلس الشعب فور انتخابه سلطة التشريع , ويقرر السياسة العامة للدولة , والخطة العامة للتنمية الاقتصادية والاجتماعية , والموازنة العامة للدولة , كما يمارس الرقابة على أعمال السلطة التنفيذية .

 ( مـــــادة 34 )

مدة مجلس الشعب خمس سنوات ميلادية من تاريخ أول اجتماع له.

(مـــــادة 60 )

يجتمع الأعضاء غير المعينين لأول مجلسى شعب وشورى فى اجتماع مشترك ، بدعوة من المجلس الأعلى للقوات المسلحة ، خلال ستة أشهر من انتخابهم ، لإنتخاب جمعية تأسيسية من مائة عضو ، تتولى إعداد مشروع دستور جديد للبلاد فى موعد غايته ستة أشهر من تاريخ تشكيلها، ويُعرض المشروع ، خلال خمسة عشر يوماً من إعداده ، على الشعب لاستفتائه فى شأنه ، ويعمل بالدستور من تاريخ إعلان موافقة الشعب عليه فى الاستفتاء .

(مــــادة 61 )

يستمر المجلس الأعلى للقوات المسلحة فى مباشرة الاختصاصات المحددة فى هذا الإعلان وذلك لحين تولى كل من مجلسى الشعب والشورى لاختصاصاتهما , وحتى انتخاب رئيس الجمهورية ومباشرته مهام منصبه كلُ فى حينه.

ممكن يكون الأعلان الدستورى قانونيا فى حاجات أعمق من كده بس اللى انا فهمته ان البرلمان الجاى هو اللى هيعمل الجمعية التأسيسة لوضع الدستور الجديد و انهم هيشرفوا معانا 5 سنين جاية على اساس ان المفروض السُلطة هتتسلم و هيبقى فى رئيس !

خلاصة الكلام ان البرلمان ده هيحدد حاجات كتيرة و لازم يبقى لينا صوت فى و مش هنسيب المجلس العسكرى يختار الناس على مزاجه و يدخلهم البرلمان .. الثورة لازم يبقى ليها صوت فى البرلمان حتى لو مالوش تأثير طول ما المجلس موجود أكيد هنستفيد بوجودهم و محدش عارف ايه ممكن يحصل بكرة.

لو عايز تعرف القوائم اللى تبع الثورة أرشحلك قائمة الثورة مستمرة رمز الهرم  .. مجرد رأى لك مطلق الحرية فى تقبله أو رفضه

عدم نزولك مش هيرجع حق الشهداء لأن دمهم أنقى و أطهر بكتير من مجرد عملية انتخابية و متربطش دمهم بالعملية دى بما فيها من قذارة ممكن تحصل.