صحيت يوم الجمعة على خبر طرد السفير الإسرائيلى من تركيا فى الأول مصدقتش الخبر و قلت مستحيل ده كده تركيا بتعلن الحرب على اسرائيل رسميا (على غرار تفكير بعض المصريين) و زمان اسرائيل بتجهز الأسطول دلوقتى و هوب يلا على تركيا.
استنيت ساعة و اتنين ان الحرب تقوم مقامتش .. يعنى احنا لو كنا طردنا السفير الحرب مكانتش هتقوم ؟
اه مكانتش هتقوم لأن دى علاقات دبلوماسية بين دولتين مش علاقة عسكرية ..احنا مدخلناش ارضهم و ضربناهم عشان يحاربونا ولا احنا عايزين حاجة منهم عشان ندخل اصلا و يبقى فى حرب , كمان امريكا الحليف الأول لاسرائيل عندهم اعصارات و ازمة اقتصادية و الحالة فى الضياع عندهم يعنى مش فايقين للكلام ده كله و احنا كنا لازم ناخد خطوة منعدش نتفرج زى كل مرة.
طيب تركيا طردوه ليه و ازاى يجرؤا على كده ؟؟ دى اسرائيل يا اخوانا !! طردوه عشان التقرير بتاع الأمم المتحدة اللى صدر عن اسطول الحرية اللى اسرائيل ضربته و قتلت 8 مدنين اتراك فى مهمة انسانية عشان يقدموا مساعدات لأهل غزة المحاصرين معجبهمش ! ايه ؟؟ اه معجبهمش و اسرائيل معتذرتش يبقى ليهم الحق فى اصدار رد فعل عن اللى حصل .. بس ده حصل من سنة ؟؟ اه حصل من سنة بس كانوا مستنين نتيجة التحقيقات عشان يقدروا يقرروا و ياخدوا قرار يرضى شعبهم و يريح اهالى الناس اللى ماتت بدون ذنب دى و دلوقتى اسرائيل خايفة من تقديم شكاوى ضد الجنود فى محاكم دولية و بتتمنى ان العلاقات مع تركيا تتصلح امبارح مش كمان شوية !! و رغم كده اسرائيل بتكابر و بترفض الاعتذار و كان تعليقهم على طرد السفير انه كان سفير رمزى و غادر تركيا من ايام تمهيدا لتعيين سفير جديد حسب صحيفة يديعوت احرونوت الاسرائيلية .. احنا عملنا ايه بقى لما 6 من جنودنا ماتوا على الحدود ولا حاجة !! مفيش رد فعل مصرى يرد كرامة المصريين ولا دم الناس اللى ماتت دى ... هتقولوا ان احنا نزلنا العلم .. تنزيل العلم ده كان تعبير عن غضب شعبى لكن انا بتكلم على رد فعل من المجلس العسكرى او رئيس الوزراء او وزير الخارجية كان لازم يبقى فى رد فعل قوى و حاسم لردعهم عن اى اعمال تانية ضد جنودنا و حدودنا و لكن لا حياة لمن تنادى.
كان ممكن نقطع عنهم الغاز أو نسحب سفيرنا من اسرائيل أو نعلق اتفاقية كامب ديفيد لحين صدور رد فعل رسمى و اعتذار للشعب المصرى (التعبير عن الأسف مش اعتذار) يمكن دى كلها تبقى حلول صعبة بس هتجيب نتيجة او فى حلول تانية دبلوماسية كان ممكن تتعمل افضل يمكن انا مش قادر اوصلها كمواطن عادى, المهم انه كان لازم يكون فى رد فعل قوى و واضح و صريح تجاه اللى حصل.
على قد ما انا فرحان من رد فعل تركيا على قد ما انا زعلان ان الموقفين متشابهين و احنا برده معملناش حاجة و ساكتين و بنعمل مسودات بس ! امتى يبقى فى تنفيذ حقيقى و نحس ان احنا اصحاب ريادة فى الشرق الاوسط , اعتقد ان الحل فى انتخابات رئاسة و تعيين رئيس للدولة منتخب عشان نقدر نحاسبه لأن المجلس العسكرى لحد دلوقتى مخدش قرار مصيرى غير الغاء التوقيت الصيفى !
و على طريقة اوشا : تركيا بتلعب سينجل و الدول العربية كلها واقفة نيكست !
لو لم أكن مصريا لوددت ان أكون مصريا...عايش فى تركيا
