المصريين و الفشخرة !

 اولا احب اقولكوا يعنى ايه فشخرة , الفشخرة ببساطة شديدة جدا هى المنظرة يعنى تعد تتمنظر على الناس و تترسم عليهم.
الانسان المصرى بطبيعته بيحب الكلمة الحلوة و المجاملات حتى لو عارف ان اللى قدامه بيجامله بس هو بيحب كده ! و عشان تطلع كلمة حلوة من حد لازم يكون فيك حاجة حلوة بلاش حلوة خليها نص حلوة و الحاجة دى بقى لازم تبقى مصحوبة بنفحة من الفشخرة عشان المدح و الاعجاب يزيدوا و انت تكييف !
مظاهر الفشخرة:
الأكل : عادة الموضوع ده مبيظهرش غير فى رمضان طبعا عشان العزومات و مين جاى عند مين و مين رايح لمين و لازم السفرة تبقى مليانة بكل انواع الأكل اللى غالبا نصه بيترمى بعد العزومة ! بس الفكرة ان الضيوف لازم يقولوا علينا ان احنا عندنا كل حاجة و السفرة مكنش فيها مكان لكباية حتى و ممكن كمان تعد بقيت الشهر مش عارف تاكل اكلة زى دى تانى بسبب ان مرتبك راح فى العزومة عشان يتقال عليكوا انكوا بتعرفوا تاكلوا !
الملابس : اهى دى بقى بقت من ابشع ظواهر الشباب المصرى , يقولك انا مبلبسش غير من زارا-ماركة عالمية- و الجزمة مش عارف منين و البوكسر منين و القميص بكام و الساعة Swiss Made أصلية و النضارة راى بان و صباح الفل و طبعا كذلك البنات مع اختلاف المسميات , اللبس حلاوته فى بساطته مش هتفرق انت جايبه منين المهم يكون حلو..
الموبايلات و العربيات : تلاقى الواحد بيبيع اللى وراه و اللى قدامه عشان يركب عربية اخر موديل و هو معهوش فلوس اصلا يحطلها بنزين و تلاقيه بيصرف ع العربية اكتر من بيتهم , كذلك الموبايل دلوقتى اعرف اللى قدامك نضيف ولا لأ من موبايله تلاقى الواحد رايح يجيب موبايل بخمس ست الاف جنيه عشان يتفشخر بيه ع الناس و هو مبيعرفش يفتحه اصلا بس يتقال عليه انه معاه موبايل نضيف و خلاص !
المصرى فى الهايبر ماركت : يبقى داخل عشان هيشترى حاجات بعينها و اذا يفاجئ و هو خارج انه العربية مليانة على اخرها و انه جاب كل حاجة عليها اوفر لمجرد انها رخصت شوية و هو مش محتاجها اساسا بس يلا الأوفر مبيجيش كل يوم !
الكلية الخاصة : عشان الواحد دخل كلية خاصة يروح يتفشخر على اصحابه بقى بالبنات شوية بالحفلات شوية بالرحلات شوية هو مش عشان ربنا فاتح على ابوك و بيعلمك فى مكان نضيف تروح تتفشخر على خلق الله...ده من تواضع لله رفعه يا أخى !
كلمة اخيرة : الفشخرة وحشة و ليها اخر و لو ربنا كارمك و عارف تعيش مرتاح بلاش تتمنظر على الخلق الواحد بيعيش مرة واحدة فعيشها ببساطة و بلاش قلاطة !
نعيش عيشة أهلنا , ننبسط كلنا

انا مصرى عشان..

انا مصرى عشان و انا صغير كنت بشترى الشيبسى عشان التازو اللى جواه و العب بيه مع اصحابى و احيانا كنا نسمع ان التازو فى سرطان و ضار جدا و بيطلع اشعاعات -طبعا خرافات- عشان منشترهوش تانى و منضيعش الخمسين قرش او الجنيه اللى كانوا حيلتنا فى اليوم

انا مصرى عشان و انا صغير كان نفسى أطلع باور رينجر لما أكبر و كنت بلعب سلاحف النينجا مع اصحابى فى الشارع و موزعين شخصيات الكارتون علينا و كل واحد بعجلته على اسم الوحش بتاع الباور رينجر

انا مصرى عشان و انا صغير كنت بلعب بيستك ناو - تخبط عالبيوت و تطلع تجرى - فى الشارع ..عمرى ما اتمسكت الحمدلله

انا مصرى عشان كنت بركن عربيتى صف تانى بس بعد الثورة احترمت نفسى و بطلت اعمل كده و افضل الف نص ساعة عشان الاقى مكان اركن فى , بس اهم حاجة متركنش صف تانى عشان اللى راكن صف أول من حقه لما يجى يطلع ميستناش سيادتك لما تيجى تشيل العربية

انا مصرى عشان بحتفظ بكل البرطمانات و الازايز اللى بتخلص..مش غلط انك تحتفظ الغلط لما الاحتفاظ يزيد عن الحد و يبقى مخزن , أقولك حاجة الزيادة وزعوا ع المحتاجين 

انا مصرى عشان بحتفظ باللبس لحد ما الدولاب يبقى هينفجر من كترهم , كل فترة بص على شوية حاجات كده, اكيد مقاسك بيتغير فى تيشيرت واحد او قميص او بلوزة وزعهم على حد محتاج هما أولى , و بلاش نغمة اصل انا بحب التى شيرت ده اوى و مش هاين عليك توزعه طالما مبقاش مقاسك , الغلابة كتير فى بلدنا

انا مصرى عشان بلف الريموت فى كيس حفاظا عليه, بصراحة دى مفيش فيها تعليق بس انا عن نفسى مبحبهاش

انا مصرى عشان بلزق فى التلفزيون و انا بتفرج او و انا قاعد على الكمبيوتر ,ابعد على الاقل نص متر عن الشاشة عايزين نظرنا يفضل كويس عشان نشوف مستقبلنا !

انا مصرى عشان بفتح التلفزيون و بنفضله و انا قاعد ع الكمبيوتر , بقولكوا ايه ما هو يا التلفزيون يا الكمبيوتر انت مش باربع عيون يعنى وفر كهرباء يا اخى , سامعك على فكرة بس مش مسألة بخل بس ده ترشيد استهلاك عشان لما جارك يفتح التكيف و جارتك فاتحة الغسالة بتغسل الحمل يخف شوية عشان الكابل ميضربش و الكابل فى بلدنا لما بيضرب بيبقى ع الدنيا السلانكتيه ! الخلاصة حاول تشغل الحاجة اللى بتستخدمها بس

انا مصرى عشان بفتح التلاجة و أقف أشرب و أكل منها و أسيبها مفتوحة لحد ما أخلص , لا افتح التلاجة مرة واحدة و طلع كل اللى انت عايزه و بعدين أقفلها و لا انت ضد البيئة

 بقى و عايز توسعلنا خرم الأوزن بالفريون !! 

انا مصرى عشان بمشى حافى فى البيت , لا تعليق !

انا مصرى عشان بقول بيقولوا او بيقولك , على فكرة مفيش ناس قالت ولا بيقولوا الفكرة

 انك بتبقى عايز تفتى فبتلبسها فى الناس اللى بتقول و هما مقالوش اساسا !

انا مصرى عشان بزيط فى الزيطة ساعات و انا مش فاهم و ساعات و انا فاهم بس بزيط

 غلط !

انا مصرى عشان نص كلامى قفشات افلام.

انا مصرى عشان بشرب شاى كتير .

انا مصرى عشان لازم احبس بسيجارة بعد الأكل .

انا مصرى عشان لما بشوف يافطة ممنوع الوقوف بعمل ولا كأنى شايفها و بركن برده .

 يا ريت نبطل العادة دى

انا مصرى عشان لما بدى معاد مبديش معاد محدد , بنقول هعدى عليك الضهر اشوفك

 بليل الخ الخ .

انا مصرى عشان بعدى الشارع لما الاشارة تفتح للعربيات 

انا مصرى عشان بتنح ع العربيات و هى ماشية و اعدى براحة

انا مصرى عشان بتمخطر بالعربية اول ما الاشارة تفتح و نطير و هى بتقفل

انا مصرى عشان اول ما بشوف خناقة لازم اقف اتفرج

انا مصرى عشان كنت بجمع الكازوز بتاع البيبسى و ابططه و العب بيه تازو

انا مصرى عشان ممكن اضرب كشرى فى كيس بلاستك 

كفاية دول بقى هبقى أكمل مرة تانية , كان فى بعض التويتات من تويتر مش هيزيدوا عن

 خمسة و الباقى انا اللى كاتبه :)